ടെൻഷൻ

അന്തരീക്ഷത്തിൽ വ്യാപിക്കുന്ന വിഷവാതകം ഭൂമിയിലെ വൃക്ഷങ്ങളെ നശിപ്പിക്കാതിരിക്കില്ലല്ലോ! അതുപോലെ തന്നെ ടെൻഷൻ മസ്തിഷ്കത്തിൻറെ പ്രവർത്തനങ്ങളെ നേരിട്ട് തന്നെ ബാധിക്കുന്നു. വിവേകം നഷ്ടപ്പെടുകയും ശരിയായ ധാരണകൾക്ക് മേൽ ഒരു മൂടുപടം വീഴുകയും ചെയ്യുന്നു.
 ഡോ. ഋഷിസാഗർ

ഗുരുജിയുടെ വചനങ്ങളുടെ അർത്ഥം പൂർണ്ണമായും ഉൾക്കൊള്ളുന്നതിനോ വിശകലനം ചെയ്യുന്നതിനോ ഉളള അറിവ് എനിക്ക് ഇല്ല. ഓരോ വാക്കും ഓരോ വചനങ്ങൾ മഹത്തുക്കൾ കുറിക്കുമ്പോൾ അതിന് ധാരാളം അർത്ഥതലങ്ങൾ ഉണ്ടാകും.  പക്ഷേ അത് വായിക്കുന്ന ഓരോ വ്യക്തിയും തൻറെ അറിവിനുളളിൽ നിന്നാകും വിശകലനം ചെയ്യുന്നതും മനസ്സിലാക്കുന്നതും. ഞാനും അങ്ങനെ ഒരു സാഹസത്തിന് മുതിരുകയാണ്. തെറ്റുകൾ ഗുരുജി ക്ഷമിക്കണം എന്നും തിരുത്തിത്തരണമെന്നുമുളള പ്രാർത്ഥനയോടെ...

ഇവിടെ ഈ വചനത്തിൽ അന്തരീക്ഷത്തിലെ വിഷവായുവിനെ കുറിച്ച് പറയുന്നുണ്ടെങ്കിലും അത് നമ്മുടെ  ടെൻഷൻ എങ്ങനെ നമ്മെ ബാധിക്കും എന്നതിന് ഉദാഹരണമായിട്ടാണ്. എങ്കിലും ആ വാക്കുകൾ നോക്കാം. വളരെ ശരിയാണ് ഇന്ന് നമ്മുടെ ചുറ്റുമുള്ള അന്തരീക്ഷവായു വിഷലിപ്തമാണ്. നമ്മൾ തന്നെ പ്രകൃതിയെ നശിപ്പിക്കുന്നു. മരങ്ങളും പുഴകളും മലകളും നശിപ്പിക്കുന്നു,  നശിപ്പിക്കാൻ കഴിയാത്ത എന്നാൽ നമ്മെ നശിപ്പിക്കാൻ കഴിയുന്ന പ്ളാസ്റ്റിക്ക് ധാരാളമായി ഉപയോഗിക്കുന്നു. രാസവസ്തുക്കൾ നിറച്ച് ഭൂമിയെ നശിപ്പിക്കുന്നു. നമുക്ക് ചെയ്യാൻ കഴിയുന്ന എല്ലാ നാശങ്ങളും ചെയ്തിട്ട് കൈകാലിട്ടടിക്കുന്നു.  നമ്മൾ പടർത്തുന്ന വിഷം കാരണം വൃക്ഷങ്ങൾ എല്ലാം നശിക്കുന്നു. അന്തരീക്ഷം കൂടുതൽ കൂടുതൽ മലിനമാകുന്നു. 

അന്തരീക്ഷത്തിലെ വിഷം നമ്മുടെയൊക്കെ മനസ്സുകളെയും ബാധിക്കുന്നു. ടെൻഷൻ എന്ന് പലപ്പോഴും നമ്മൾ അഭിമാനത്തോടേ പറയാറുണ്ട്.  എന്തിനാണ് ടെൻഷൻ?  എന്തുകൊണ്ടാണ് ടെൻഷൻ?  നമ്മുടെ സ്വാർത്ഥതകളും അത്യാർത്തികളുമല്ലേ പലപ്പോഴും ടെൻഷന് കാരണം.  അടുത്തവനെ നോക്കി അസൂയപ്പെടുമ്പോൾ അല്ലേ കൂടുതൽ ടെൻഷൻ.  അയല്പ്പക്കകാരനേക്കാൾ ഉയരത്തിലെത്താൻ പായുമ്പോൾ അടുത്ത വീട്ടിലെ കുട്ടിയെക്കാൾ നമ്മുടെ കുട്ടിയെ മുന്നിലെത്തിക്കാൻ ശ്രമിക്കുമ്പോൾ മറ്റുളളവരുടെ മുന്നിൽ സ്റ്റാറ്റസ് കാണിക്കാനായി കഴിയാത്തതും നിവൃത്തിയില്ലാത്തതും ചെയ്യാൻ നോക്കുമ്പോൾ ഒക്കെയല്ലേ അധികവും ടെൻഷൻ. മനസ്സിൻറെ സമ്മർദ്ദം ശരീരത്തെ ബാധിക്കുന്നു. ചിന്തകളെ ബാധിക്കുന്നു. ബുദ്ധിയെ ബാധിക്കുന്നു. അപ്പോൾ വിവേകം നഷ്ടമാകുന്നു. തീരുമാനങ്ങളും പ്രവൃത്തികളും തെറ്റാകുന്നു. അതിൻറെ ഫലമായി കൂടുതൽ പ്രശ്നങ്ങളിലേയ്ക്കും ടെൻഷനിലേയ്ക്കും പോകുന്നു.  ടെൻഷൻ  ബുദ്ധിയെ ബാധിക്കുമ്പോൾ നമ്മൾ മനസ്സിലാക്കുന്നതൊക്കെയും തെറ്റായതിനിയാകും. അത് ശരിയെന്ന് വിചാരിക്കും. സത്യമെന്ന് കരുതും. അതിനാൽ ടെൻഷൻ ആരംഭത്തിലേ മനസ്സിനെ റിലാക്സ് ആക്കാനുള്ള വഴികൾ തേടുക. മനസ്സിന് സന്തോഷം നല്കുന്ന കാര്യങ്ങളിലേയ്ക്ക് ശ്രദ്ധിക്കുക.  നമ്മളെന്തായിരിക്കുന്നോ അതായിരിക്കുമ്പോൾ, നമുക്ക് എന്ത് ഉണ്ടോ അതിൽ സംതൃപ്തരാകുമ്പോൾ, നമ്മുടെ കർമ്മങ്ങൾ സന്തോഷത്തോടെ നിർവ്വഹിക്കുമ്പോൾ ഒരു ടെൻഷനും ഉണ്ടാകുന്നില്ല. ധ്യാനം ശീലിക്കുന്നത് ടെൻഷൻ കുറയ്ക്കാൻ ഉപകരിക്കും.  


കടപ്പാട് :- https://chat.whatsapp.com/48eilk23yzs1qMlGNp6M2o